|
|
चिकुनगुन्या हा अरबो व्हायरस या विषाणूमुळे होणारा व एडिस इजिप्टी या डासामुळे पसरणारा आजार आहे.साहिली भाषेतील एका शब्दापासून या आजाराच्या नावाची उत्पत्ती झाली आहे.
|
डास व चिकुनगुन्या विषाणू
|
चिकुनगुन्या आजार हा दुषित एडीस इजिप्टी डासाची मादी चावल्यामुळे होतो. ही डासाची मादी चिकुनगुन्या आजारी रुग्णाचे रक्त शोषून बाधित होत असते.
|
आजाराची लक्षणे साधारणतः दूषित डास चावल्यावर ३ ते ७ दिवसारनंतर दिसून येतात. या आजाराचा अधिशयन काळ ४ –७ दिवस आहे.
|
चिकुनगुन्या आजाराची सुरुवात अचानक खालील लक्षणांसह होते.
- ताप
- हुडहुडी भरणे
- डोके दुखणे
- मळमळ होणे
- ओकारी होणे
- तीव्र सांधेदुखी
- अंगावरील पुरळ
या आजारात वाक येणे किंवा कमरेतून वाकलेला रुग्ण हे अतिशय नेहमी आढळणारे लक्षणे आहे. चिकुनगुन्या आजारातून बरे होताना पुष्कळदा नेहमी व सतत राहणारी सांधेदुखी आढळून येते. त्याकरीता दिर्घकाळ वेदनाशामक उपचारांची गरज भासू शकते.
|
चिकुनगुन्या आजाराचे निदान एलायझा या रक्त तपासणी (ELISA TEST ) व्दारे करण्यात येते.
|
चिकुनगुन्या आजाराकरीता विशिष्ट असा औषधोपचार उपलब्ध नाही. या आजारात लक्षणांनुसार उपचार केल्यास व वेदनाशामक औषध घेतल्यास तसेच भरपूर आराम केल्यास रुग्णाला फायदयाचे ठरते. आजारी व्यक्तिला डास चावू नये, याकरीता काळजी घ्यावी. जेणेकरुन इतर व्यक्तिमध्ये आजाराचा प्रसार होणार नाही.
|
जनतेला खालील बाबीकरीता आरोग्य शिक्षण देण्यात यावे.
- घरातील पाणी साठविण्याची सर्व भांडी आठवडयातून रिकामी करा.
- पाणी साठविण्याची सर्व भांडी योग्य पध्दतीने झाकून ठेवा.
- घराच्या भोवतालचा परिसर स्वच्छ व कोरडा ठेवावा.
- निरुपयोगी व टाकाऊ वस्तू घराच्या छतावर आणि परिसरात ठेवू नका.
- शक्यतो पूर्ण अंग झाकेल असे कपडे वापरावेत.
|
|